കവിത: രാവിന്റെ ഗദ്ഗദങ്ങൾ
രചന: രജനി നാരായൺ
***************
രാക്കിനാവിന് വിഹരിക്കാൻ
കൊടുത്തിട്ടലയാൻ വിടാതെൻ
മനസ്സിനെ പൂട്ടി ഞാനാപകലിലെ
കർമ്മങ്ങൾ ചികഞ്ഞൊരു
മൂലയിൽ കൂട്ടിടുന്നു
പതിരും പൊടികളും
ഒന്നും നിറഞ്ഞില്ലാച്ചെപ്പി-
നുള്ളിലൊരു കുഞ്ഞുസ്വപ്നം
ബാക്കിയായില്ലത്തിൽ പടി-
യിറങ്ങി മുന്നോട്ട് ദിക്കൊന്നുമേ
കണ്ടതില്ലന്ധകാരത്തിൻ
നെരിപ്പോടുകൾ മാത്രമായ്!
എന്തോ കണ്ടങ്ങോരിയിടും
നായ്ക്കുമൊപ്പമതിലങ്കം
പിടിക്കുവാൻ മൂങ്ങയും മൂളുന്നു!
ചന്തം വെടിഞ്ഞൊരാ
സ്വപ്നത്തിൽ നിന്നെന്നെ മന്ദമായ്
തട്ടിയുണർത്തിയാമാരുതൻ!!!
