પુસ્તકમેળામાં પઠન :
( ઉંમર થઇ તો થઇ )
હસતાં રડતાં હરતાં ફરતાં વરસો વીત્યાં ભૈ
અનુભવે આ ધોળા થ્યા છે,કેવળ તડકે નૈ
વય સાથે યૌવનની શોભા જાતે ઓસરી ગૈ
ઉંમર થઇ તો થઇ
નાના હતા તો મોટા થાવા
જોઇ’તી કેટલી વાટ
રમતા રમતા દિવસ વીત્યા ને
રોતા રોતા રાત
મૂંઝવતી એ મુગ્ધાવસ્થા મુંઝારામાં ગૈ
ઉંમર થઇ તો થઇ
વસંત ખીલી તનમાં,
ઊગ્યાં ફૂલ ગુલાબી સપના,
બ્હાનું શોધતાં અડી જવાનું ,
મળતાં છાનાંછપના
દર્પણ સાથે દોસ્તી કેરી મોસમ બેઠી , સૈ
ઉંમર થઇ તો થઇ
ઇંતઝાર ને આંસુ ભીની
કવિતાને પણ માણી
સાથે હોવું એટલે શું
એ વાતને જીવી જાણી
ઉંબરિયેથી કંકુપગલાં આવ્યાં ઘરની મૈં
ઉંમર થઇ તો થઇ
ફૂલ તો ખીલવાના ઉપવનમાં
જોઇને હરખાવું
આંખોથી પણ સુગંધ માણું,
નિરાશ શાને થાવુ
સુંદર હોય ને સુંદર લાગે, તો જોવાનું નૈં ?
ઉંમર થઇ તો થઇ
હવે છે માથે ધોળા,
એને શાને કરવાં કાળાં ?
દિલથી યુવાન હોવાના
શું કરવા ખોટાં ચાળા
આવી ત્યારથી હતી જવાની,સમય થયો કે ગૈ
ઉંમર થઇ તો થઇ
બખિયા સાંધા કરવાથી તો
પોતની શોભા જાય
જીવતરનાં વસ્તર પર અમથા
થીગડાં ના જ મરાય
પાનખરે જે પાન ખરે તે પાછાં ચોંટે નૈં
ઉંમર થઇ તો થઇ
હવે નવી ઇચ્છાને ભૂલી
માનું છું આભાર
બદલાયેલા રુપ રંગનો
સહજ કરું સ્વીકાર
છોડવા જેવું ઝાલ્યું’તું એ સમજણ આવી ગૈ
ઉંમર થઇ તો થઇ
- તુષાર શુક્લ
