ગઝલ
#anilchavda #gazal #shayri #kavita #shayar #gujarat #gujarati
માર્યું હો જેમ તાળું સજ્જડ ભીડ્યાં કમાડે,
હું પણ છું સાવ એવો; છે કોઈ જે ઉઘાડે?
જન્મ્યો ટપાલથેલો થઈ માંડમાંડ હું, ત્યાં-
દુનિયા ચડી ગઈ છે ઈમે’લના રવાડે!
ઇચ્છાની સૌ અહલ્યા રઘવાઈ થઈ ગઈ છે,
ભીતરનો રામ જબરો, ચરણો જ ના અડાડે!
એ કામ શંખ ફૂંકી કરવું પડે છે કાયમ,
જે કામ થઈ શકે નહિ અહીં વાંસળી વગાડે.
આવું સમયની બાબત પણ થાય, કેવું સારું
દુકાનદાર માફક પ્હેલા એ પળ ચખાડે!
~ અનિલ ચાવડા
