દરેક વાતને ખોલો અને તપાસ કરો,
દુઃખોના મૂળને શોધો અને તપાસ કરો !
પડ્યાં દટાઈને જમીનમાં જ ઇતિહાસો,
કશું ન સાંભળો ખોદો અને તપાસ કરો !
કરાવ્યો કોણે અહીંયા અસત્યનો મહિમા,
તમે સમૂહને રોકો અને તપાસ કરો !
તમે છો એક અને તમને એવું કહેશે કે
દશેદિશાઓમાં દોડો અને તપાસ કરો !
અહીં નથી તે બધું એ તરફ છે શા માટે,
બધી દિવાલને તોડો અને તપાસ કરો !
તમારી વસ્તુઓ મૂકીને સામા પલ્લામાં,
આ તોલમાપને તોલો અને તપાસ કરો !
કદાચ તળમાં પડી હોય છે અશુદ્ધિઓ,
આ જળ જરાક ડહોળો અને તપાસ કરો !
- ભરત વિંઝુડા
