તમે કવિતા લખો નહીં, તમે કવિતા છો,
સ્વયમની સામે પડો નહીં તમે કવિતા છો !
તમારી આજુબાજુમાં બધું કવિતામય,
બની ગયું છે જશો નહીં, તમે કવિતા છો !
નહીં તમારા વગર ચાલે શ્વાસની માફક,
નજરથી દૂર રહો નહીં, તમે કવિતા છો !
બધાય જાણતલ તો જાણે છે પિછાણે છે,
ભલે કોઈને કહો નહીં, તમે કવિતા છો !
સ્વરૂપ સૃષ્ટિમાં ઈશ્વરનું હોય છે એવું,
તમારું છે એ ભૂલો નહીં, તમે કવિતા છો !
સરસ્વતીનું છે વરદાન કોઈના ઉપર,
તમે બધાને મળો નહીં, તમે કવિતા છો !
- ભરત વિંઝુડા
