The Download Link has been successfully sent to your Mobile Number. Please Download the App.
Continue log in with
By clicking Log In, you agree to Matrubharti "Terms of Use" and "Privacy Policy"
Verification
Download App
Get a link to download app
" વીરોને વંદન " કારગિલના એ શિખરે જેમણે જીતનો ઝંડો લહેરાવ્યો, માતૃભૂમિની રક્ષા કાજે એમણે પોતાનો જીવ ગુમાવ્યો. દુશ્મનોને ધૂળ ચટાડી, સિંહની જેમ એ તો ગર્જ્યા હતા, દેશ કાજે વહાવી લોહીની ધારા, એ વીરો લડ્યા હતા! આજે તિરંગો ગર્વથી લહેરાઈ રહ્યો છે જે આકાશમાં, એ અમર જવાનોની કુરબાની રહે છે દરેકના શ્વાસમાં. ધન્ય છે આ ભારતની માટી જેમાં આવા સપૂતો પાક્યા, શીશ નમાવી વંદન કરતાં "વ્યોમ" હિન્દુસ્તાની ન થાક્યા. ✍...© વિનોદ. મો. સોલંકી "વ્યોમ" જેટકો (જીઈબી) અંજાર. મુ. રાપર.
ઝરમર ઝરમર વરસે વરસાદ, તન મન તડપાવે તારી યાદ. ગરજે છે વાદળ આસમાનમાં , કરે છે તારા નામનો સાદ. ભીની ભીની આ માટી મહેકે, મોર, પપૈયા ને કોયલ ચહેકે, કરે છે વૃક્ષો, સંગ સંગ ઉન્માદ, કરે છે તારા નામનો સાદ....... ટીપે ટીપે તારી યાદો છલકાય છે, પલળ્યા વિના મન ભીંજાય છે, આ તે કેવો છે પ્રણયનો સ્વાદ, કરે છે તારા નામનો સાદ........ સુની આ રાતો ને સુના છે દિવસો, "વ્યોમ" પરથી અમી છાંટા વરસો, થશે પૂરો હવે આ મિલનનો સંવાદ, કરે છે તારા નામનો સાદ........... ઝરમર ઝરમર વરસે વરસાદ, તન મન તડપાવે તારી યાદ. ગરજે છે વાદળ આસમાનમાં , કરે છે તારા નામનો સાદ. ✍...© વિનોદ. મો. સોલંકી "વ્યોમ" જેટકો (જીઈબી) અંજાર. મુ. રાપર.
" મેઘલી રાતનો વરસાદ " આવો જરા સંગાથે, જામ્યો છે વરસાદ! આજ મોસમની રાતે, લાવે છે તારી યાદ! વાદળ નમ્યાં ભૂમિને, આજ ચૂમવાને કાજ, અમી વરસે છે માથે, ભીંજવશે તારો સાથ! બેઠો હતો હું લઈને, સ્મરણની કલમ આજ, છે કાગળ કોરો હાથે, કમળ સરીખો તાજ! કોરી છે સદીઓથી જે, હૃદયની આ ભૂમિ, ને આજ તારી વાતે, મેઘલી રાત પણ ઝૂમી! ભીની ભીની માટીમાં, સંબંધો પણ મહેકે, વ્યોમ પ્રીતના જ નાતે, ચાતક બની ચહેકે! ✍...© વિનોદ. મો. સોલંકી "વ્યોમ" જેટકો (જીઈબી)અંજાર. મુ. રાપર.
" એક જૂની કિતાબ " મહેકી ઊઠ્યું છે આજ એ ગુલાબ, જ્યારે મેં ખોલી એક જૂની કિતાબ. સ્મરણ છે એનાં આજ પણ અકબંધ, એની યાદોનો કેમ કરવો હિસાબ? મુસ્કુરાતાં પૂછ્યો હતો એક સવાલ, આંખો ઝુકાવી આપ્યો હતો જવાબ. એકરાર કર્યો હતો મેં અમારા પ્રેમનો, ક્ષણ પણ હતી એ કેવી લાજવાબ. છતાંય અધૂરી રહી ગઈ જે અધવચ્ચે, એ સફરનો પણ છે અનોખો રુઆબ. જરૂર નથી "વ્યોમ" કોઈ શિરપાવની, એ હોઠોની મુસ્કાન જ મારો ખિતાબ. ✍...© વિનોદ. મો. સોલંકી "વ્યોમ" જેટકો (જીઈબી) અંજાર. મુ. રાપર
" રાખમાંથી બેઠું થતું જીવન " પળભર પહેલાં કંઈ ન હતું પળમાં ધરા ધ્રુજી ગઈ, ઉછળતી-કૂદતી જિંદગી એ ક્ષણમાં જ થીજી ગઈ. અસ્તવ્યસ્ત કરી નાખ્યું જીવન, એક ગોઝારા ભૂકંપે, ઢોર ને ઢાંખર મર્યાં, માનવની જાન અને પૂંજી ગઈ. પડ્યા ઉપર જ પાટું માર્યું આ કોરોના મહામારીએ, થપાટ ના જાણે આ કેવી કુદરત જોરથી વીંઝી ગઈ. ખોવાયા હસતા ચહેરા ને થઈ સુમસામ આખી વસ્તી, કુદરતની આ આફત સામે, વિજ્ઞાનની પણ કૂંજી ગઈ. રાખમાંથી બેઠા થવાની તાકાત દુનિયાની જોઈ "વ્યોમ", જીવનના ઘડતર કાજે, આફતની આગ ખુદ બૂઝી ગઈ. ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
" કચ્છી નવા વર્ષની હાર્દિક શુભકામના " આવ્યો રે આવ્યો મહિનો અષાઢ કચ્છી હૈયાં આજ હરખાય અગાધ. આસમાનમાં કેવી ચમકે છે વીજ, આવી રે આવી લ્યો અષાઢી બીજ. મોરલા ટહુકે, કોયલ કરે મીઠો સાદ, કચ્છી હૈયાઓમાં છે હરખ અગાધ. નવા વર્ષનો આજથી મંગળ પ્રારંભ, નવી આશા, નવા ઉમંગનો આરંભ. દુઃખ કે દર્દ કોઈની ના આવે પાસ, ઘરમાં લક્ષ્મીજીનો રહે સદા નિવાસ. જય શ્રી લક્ષ્મીનારાયણ મુખે ગવાય, કચ્છીઓના મનમાં હરખ ના સમાય. નૂતન વર્ષના સહુને રામ રામ ભાઇ, આનંદ વેરો ને આજ વહેંચો મીઠાઇ. ખેતરે વરસજો "વ્યોમ" અમી સહર્ષ, હર કોઈને ફળે આ કચ્છી નવું વર્ષ! ✍...© વિનોદ. મો. સોલંકી "વ્યોમ" જેટકો (જીઈબી),... અંજાર.
" વર્ષાનું આગમન " કોરા કાગળ જેવા મનમાં, વર્ષાની થઈ સોગાત, જોને આવી સૃષ્ટિ કાજે, કેવી ઘડી આ રળિયાત. ઘેરાયાં છે વાદળ નભમાં, પવન લાવ્યો છે પેગામ, ધરતીના કણ-કણમાં જાગી, ઉત્સવની શરૂઆત. ચકલી, મોર, કોયલ ટહુક્યા, સીમ બધી હરખાઈ, ઝરમર વરસ્યા ફોરાં ને, ખીલ્યું મોસમી પ્રભાત. મઘમઘ મહેકી ઊઠી ધરા ને, છે ખુશ્બૂનો અંબાર, લાગે કુદરતની આજે, આ ધરતી પર છે ખેરાત. તન સાથે મન ભીંજવીએ, આ પહેલા વરસાદમાં, વરસાદી માહોલમાં "વ્યોમ" કરીએ દિલની વાત! ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
" કલમની તાકાત " એક નાની સરખી માચીસ આખું શહેર સળગાવી શકે. પણ વિચારોની નવી સૃષ્ટિ તો કલમ જ જગાવી શકે. નોટોના બંડલથી ખરીદી લેશો સુખનાં બધાં જ સાધનો, પણ, કોઈના હોઠ પર સાચું સ્મિત કલમ જ લાવી શકે. ધન, દોલત ને આગનો તો ક્ષણભરમાં થઈ જાશે ધુમાડો, પણ ઇતિહાસના પાને અમર નામ કલમ જ લખાવી શકે. તલવાર કે દોલત નથી બદલી શકતી કોઈના નસીબને, પણ ભાગ્યની રેખાને બસ એક કલમ જ બદલાવી શકે. દુનિયા જીતવા નીકળ્યા જે ધન અને મનમાં અગન લઈ, "વ્યોમ" બધાને ઈશ્વર સામે એક કલમ જ ઝૂકાવી શકે. ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
Copyright © 2026, Matrubharti Technologies Pvt. Ltd. All Rights Reserved | Powered by Nichetech.
Copyright © 2026, Matrubharti Technologies Pvt. Ltd. All Rights Reserved.
Please enable javascript on your browser
