The Download Link has been successfully sent to your Mobile Number. Please Download the App.
Continue log in with
By clicking Log In, you agree to Matrubharti "Terms of Use" and "Privacy Policy"
Verification
Download App
Get a link to download app
" પ્યાર કલ્પનાથી પાર " ના પૂછીશ મને કે, કેટલો મને પ્યાર છે? મારી ચાહત તો તારી કલ્પનાથી પાર છે. હશે તારા માટે હર સબંધ તારી દુનિયા, મારા માટે તો બસ તું જ પૂરો સંસાર છે. રહે તું પાસે કે પછી, રહે તું મારાથી દૂર, હર ક્ષણ આ હૃદયને, તારો ઇંતેજાર છે. શ્વાસે શ્વાસમાં ભરી બસ ખુશ્બુ તારી, હોઠો પર ફક્ત તારા નામનો ઉચ્ચાર છે. ખ્વાબ ને ખ્યાલોમાં બસ તું ને તું જ છે, જીવનના નજારે "વ્યોમ" તારા દિદાર છે. ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
" ખરેખર ? " નજરથી નજર મળતાં આંખો થઈ 'તી ચાર, ખરેખર! પહેલી નજરનું તીર થયું' તું દિલની આરપાર, ખરેખર! ના લાગતી ભૂખ તરસ, બસ મન રહેતું કાયમ ગુમસૂમ, સતત એના વિચારોમાં જ દિલ રહેતું બેકરાર, ખરેખર! બસ, એક ઝલક એની દેખવા રહેતો આકુલવ્યાકુલ, વળતી દિલને ટાઢક જ્યારે થતાં એનાં દિદાર, ખરેખર! એ પગપાળા ચાલતી આગળ, સાઈકલથી હું પાછળ, પૈડાં ઘસાઈ ગયાં હતાં સાઈકલના દસ બાર, ખરેખર! આજ તો હું જરૂર કહી દઈશ, મારા દિલની વાત એને, ચૂપ થઈ જતો એની સામે, ના થતો એકરાર, ખરેખર! કિશોરાવસ્થાની એ નાદાનિયત પણ ખુબ યાદ આવે છે, "વ્યોમ" એ હતું બસ આકર્ષણ, નહીં કે પ્યાર, ખરેખર???? ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
" હે ઈશ્વર " નતમસ્તક છું હું, હે ઈશ્વર. બીજું તો શું કહું? હે ઈશ્વર. કસોટી સમજીને જીવનની, કષ્ટો બધાં સહું, હે ઈશ્વર. આસ્થા ન ડગમગવા દઈસ, તારા સમીપ રહું, હે ઈશ્વર. અંત વેળા પણ રહે સામે તું, ન માંગુ એથી બહુ, હે ઈશ્વર. "વ્યોમ" પર તું, ભોમ પર હું. છતાં પણ તને ચહું, હે ઈશ્વર. ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
" ઉદાસ બની ગયું " આજકાલ મન મારું ઉદાસ બની ગયું. હાલતું ચાલતું આ તન લાશ બની ગયું. હતાં ખાસ જેમના માટે ક્યારેક અમે, કોઈ બીજું જ એમનું ખાસ બની ગયું. આ તે શું થઈ રહ્યું છે મારી જિંદગીમાં? કે, તારા નિર્ણયથી મન નિરાશ બની ગયું. ફરીયાદ નથી, બસ ઊભરો ફાલવું છું પ્રભુ, સાથે છે તું તો જીવન કેમ ભાસ બની ગયું? નથી રહ્યું કોઈ સ્થાન મારા માટે ધરા પર, "વ્યોમ" જ હવે અંતિમ નિવાસ બની ગયું. ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
" લાગણી થઈ ઠંડી" આજકાલ સબંધોમાં મંદી લાગી ગઈ છે. એમ કહો કે લાગણીમાં ઠંડી લાગી ગઈ છે. નથી રહ્યું કોઈ-કોઈનું પણ આજકાલ તો, બે ભાઈઓ વચ્ચે જુવો વંડી લાગી ગઈ છે. પાશ્ચાત્ય સંસ્કૃતિ પાછળ ઘેલા યુવાનોને, પણ, આદતોય કેવી ગંદી લાગી ગઈ છે? વેચાય છે ખુલ્લે આમ એ જ જગ્યાએ, જ્યાં કહેવાય કે દારૂબંધી લાગી ગઈ છે. મોક્ષનો માર્ગ બસ એમને મળશે "વ્યોમ " હાથમાં જેના ઈશ્વરની કંઠી લાગી ગઈ છે ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
" વલોપાત " જીવનભર કરતાં જ રહ્યાં વલોપાત એ. છતાં સુધારી ના શક્યાં ખુદની જાત એ. પાશ્ચાત્ય સંસ્કૃતિ પાછળ મૂકી એવી દોટ, કે, સમજી ના શક્યાં એના પ્રત્યાઘાત એ. મોહ માયા ને લોભ લાલચમાં ફસાતાં, નોતરતાં રહ્યાં રોજેરોજ નવી ઘાત એ. દેખા દેખીમાં જ અપનાવી ખોટી પરંપરા, ને, ગુમાવી બેઠાં ખુદની જ રીતભાત એ. છોડ્યાં ધરમ ને સંસ્કૃતિ જેમણે "વ્યોમ" ઈતિહાસ છે સાક્ષી કે ખોવાઈ નાત એ. ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
" ઊડી ગયું પંખી ટહુકીને " જનારાં તો ચાલ્યાં ગયાં અમને એકલાં મૂકીને. ને અમે ભોગવ્યો એકાંતવાસ એમનું નામ ઘૂંટીને. સતત મહેસૂસ થયા કરે ટેરવે, સ્પંદન સ્પર્શનાં! અનિમેષ નજરે દેખું છું, બસ એ જ અંગુઠીને. એકલતા શું છે? એ, એ ડાળને જઈને પૂછો! ઊડી ગયું છે પંખી જ્યાંથી, હમણાં ટહુકીને. પ્રેમ, પ્યાર, વ્હાલનો મતલબ એ શું જાણશે? જે, કરે છે દોસ્તી તો પણ કરે છે પૂછી પૂછીને. કાંગરાય ખરવા લાગ્યા આજ એ કિલ્લાના, ઉભો 'તો તવારીખે ક્યારેક જે ગગનચુંબીને. જખમો પ્રણયનાં રૂઝાતાં નથી હવે તો કોઈ, સ્મિત પણ લઈ ગયાં છે જતાં જતાં લૂંટીને. ડામ પ્રણયનાં કંઈક એવા લાગ્યા છે "વ્યોમ" કે લાગણી પણ દર્શાવાય છે હવે ફૂંકી ફૂંકીને. ✍...© વિનોદ. મો. સોલંકી "વ્યોમ" જેટકો (જીઈબી), મુ. રાપર
" પીંજરું નીકળતું નથી " શીખ આપવાની રીત ન્યારી જિંદગીની, એ શીખવે જે, એ કોઈ શીખવતું નથી. એ દોસ્ત, મને ન યાદ કરાવીશ તું એને, બાદમાં, દિલ એને કેમેય વીસરતું નથી. પ્રણયમાં મતલબની દોસ્તી ન મિલાવ, પાષાણ દિલ કદી પણ પીગળતું નથી. પંખી તો પાજરેથી નીકળી ગયું, પણ! એ પંખીમાંથી પાંજરું નીકળતું નથી. નિર્મળ તો લાગણીથી ભીંજાઈ જાય, નિષ્ઠુરને "વ્યોમ" પણ ભીંજવતું નથી. ✍...© વિનોદ. મો. સોલંકી "વ્યોમ" જેટકો (જીઈબી ), મુ. રાપર
" ધડકતું એરણ " આંખની લાલાશનું કારણ પણ એનું એ જ છે. બંજર આ દિલમાં હજુ ભારણ એનું એ જ છે. શિકાર અંગતોએ, એમ ને એમ તો ન'તો જ કર્યો, સ્વાર્થથી ભરેલું લાગણીનું મારણ એનું એ જ છે. ઢાંકીને રાખું છું હું પીઠ મારી એ જ તો કારણથી, જખ્મો છે અલગ પરંતુ સગપણ એનું એ જ છે. સળગતો રહ્યો એકલો, બનીને ચિરાગ મજારનો, કારણ ન પૂછો મને, કેમ કે કારણ એનું એ જ છે. સિતમ કેરા હથોડા, જમાનાનાં તૂટ્યા અસંખ્ય, પરંતુ, "વ્યોમ" ધડકતું એક એરણ એનું એ જ છે. ✍...© વિનોદ. મો. સોલંકી "વ્યોમ" જેટકો (જીઈબી , મુ. રાપર
" જિંદગીની ગઝલ" શ્વાસોની શ્યાહી, કલમમાં ભરી અમે. ને, જિંદગીની એક ગઝલ લખી અમે. ડગલેને પગલે વાગી એવી ઠોકર કે, દુધનાં દાઝયાં પીએ છાશ ફૂંકી અમે. એક સાંધીએ ત્યાં તૂટે તેર, જીવનમાં! ચીથડે હાલ જિંદગીમાંય રાજી અમે. ટૂંટિયું વાળી તો ટૂંટિયું વાળીને સુતાં, પણ, ચાદર પ્રમાણે સોડ તાણી અમે. સાંભળ્યું છે કે અંત હોય સુખકારી, 'વ્યોમ' અંતીમ ઘડી એ ચાહી અમે. ✍... વિનોદ. મો. સોલંકી "વ્યોમ" જેટકો (જીઈબી), મુ. રાપર.
Copyright © 2026, Matrubharti Technologies Pvt. Ltd. All Rights Reserved.
Please enable javascript on your browser
