The Download Link has been successfully sent to your Mobile Number. Please Download the App.
Continue log in with
By clicking Log In, you agree to Matrubharti "Terms of Use" and "Privacy Policy"
Verification
Download App
Get a link to download app
મનમાં ઊગ્યું એક વૃક્ષ જે કાયમ લીલુંછમ રહેતું. મનમાં ઊગ્યું એક વૃક્ષ જે વાત પરહિતની કહેતું. હરિયાળી મનતણી હરપળ નિતનવી પરખાતી, મનમાં ઊગ્યું એક વૃક્ષ જે શીતળ છાંયાને દેતું. કલરવ કરે પંખીડાંઓ જે તરુવરે ગીત ગાનારા, મનમાં ઊગ્યું એક વૃક્ષ જે અનિલસંગ ઝૂમતું. દ્રુમછાયામાં થાક્યો પથિક વિશ્રામ કેવો મળતો, મનમાં ઊગ્યું એક વૃક્ષ જે ફળફૂલ સદા ખેરવતું. વર્ષાનાં બુંદો ગ્રહીને વરસાદ પછી પણ વરસતું, મનમાં ઊગ્યું એક વૃક્ષ જેમ મોટું થાય તેમ નમતું. - ચૈતન્ય જોષી. " દીપક " પોરબંદર.
અપમાન સહીસહીને વીતાવી જિંદગી અમે તો. સ્વમાન મૂકીમૂકીને વીતાવી જિંદગી અમે તો. સમય મોટામોટા ચમરબંધીનેય ઝૂકાવનારો છે, આશ્વસન લઈલઈને વીતાવી જિંદગી અમે તો. આખરે ગુલામ માનવી સંજોગોની નાગચૂડમાં, ઉરઅગન સહીસહીને વીતાવી જિંદગી અમે તો. સ્વામિ સંજોગોનું થવાનું સાફલ્ય મળે ના મળે, આશાદફન કરીકરીને વીતાવી જિંદગી અમે તો. જીવ મોટો નાનાને ગળવા સદા તત્પર રહેનારો, મનોમંથન ફરીફરીને વીતાવી જિંદગી અમે તો. - ચૈતન્ય જોષી. " દીપક " પોરબંદર.
તું દીકરી બનીને અવતરી મારા ઘરે . ને સાક્ષાત્ લક્ષ્મી આવી મારા ઘરે. છો દીકરી પણ વિવિધ રોલ નિભાવે, પિતાની ભગિની થઈ તું મારા ઘરે. ક્યારેક કાળજી મા સમી તું લેનારી, પુનીત પગલાં થયાં ફરીફરી મારા ઘરે. કેવળ પ્રેમ જ નહીં વઢનારી પણ ખરી, જીવન સાથિયે રંગ ભરીભરી મારા ઘરે. એકમાં અનેકસમી આશિષ ઈશનો છે, હિંમત આપતી જ્યાં ખરાખરી મારા ઘરે. હે ઈશ્વર તારાં સુતારૂપને શતશત વંદન, બુઢાપે તું ટેકણ લાકડી બની મારા ઘરે. - ચૈતન્ય જોષી. ' દીપક ' પોરબંદર.
અંતરથી અંતર ઘટાડો પ્રભુજી. ચરણ તમારાં દેખાડો પ્રભુજી. આસન લ્યો અબ્ધિવાસી અંતરે આમંત્રણ મારું સ્વીકારો પ્રભુજી. ક્યારે બુઝશે તૃષા નયનની હરિ, વિષયવાસનાને હવે ટાળો પ્રભુજી. દીન બનીને શરણાગત થયો છું, તમારાં છીએ તો સંભાળો પ્રભુજી. તડપન ઉરની અવિરત અધિકને, પાણી પહેલાં બાંધો પાળો પ્રભુજી. - ચૈતન્ય જોષી. ' દીપક ' પોરબંદર
સંકેત તમારા સમજવામાં અમે ઊણા ઊતર્યા. સ્નેહ તમારો પરખવામાં અમે ઊણા ઊતર્યા. ન સમજી શક્યા તમારો ઈશારો કદી હરિવર, વાત જે તમારી સમજવામાં અમે ઊણા ઊતર્યા. આફતને અમે અડચણ માનીને ઊકળતા રહ્યા, તમારી મૌન ભાષા ઉકેલવામાં અમે ઊણા ઊતર્યા. તમે તો વિચાર્યું હતું હરિ જે હોય અમારા હિતનું, તમારાં ગૂઢ પગલાં ઓળખવામાં અમે ઊણા ઊતર્યા. સ્વાર્થની સંકુચિતતામાં અટવાતા રહેતા અવિરત, તમારી વત્સલતાને વિચારવામાં અમે ઊણા ઊતર્યા. ક્ષમા કરજો હરિવર માનવમગતરાં અમને ગણીને, માત્ર મંદિરોમાં તમને શોધવામાં અમે ઊણા ઊતર્યા. - ચૈતન્ય જોષી. " દીપક " પોરબંદર.
શબ્દની ઢાલમાં અર્થ છૂપાયા કરે. વાણીમાં આવતાં એ દેખાયા કરે. આરોહ,અવરોહ બળ આપનારા, એમાં ભાવ ભળતાં પરખાયા કરે. લપાઈ જાય દેહભાષાની ઓથમાં, નિ:શબ્દ લાગણી ઊભરાયા કરે. સંધિસમાસે વિશેષ બળવત્તર બની, અર્થની ભારોભાર છલકાયા કરે. શબ્દ સંયોજને વાક્યથી કંડિકાને, વર્ણન પામવા કલમે કંડારાયા કરે. - ચૈતન્ય જોષી. " દીપક " પોરબંદર.
એક જ અરમાન હરિવર પૂરું કરી દે. છું માનવ તો માનવતા મારામાં ભરી દે. આયખું નાનું પડે ક્યારેક સમજવામાં, અધૂરપ પૂરવા માનવજન્મ મને ફરી દે. તારી કૃપા લેખું કે તારી યાદ સતાવે છે, જીવન જીવવાની રીત હોય જે ખરી દે. ધન્યતા અનુભવું કામ માનવતાના કરી, એકાદ વાર અજમાવી તારા જેવો કરી દે. નથી માંગવું કોઈની પાસે કશુંએ મુજને, એક જ અભિલાષા નીરખું આંખ નરી દે. - ચૈતન્ય જોષી. " દીપક " પોરબંદર.
સતત છે ઝંખના મારી, તમે આવો તો સારું. નૈન થયાં છે ભારીભારી, તમે આવો તો સારું. શ્રદ્ધાની બુનિયાદે આગળ ધપું છું નિરંતર હું, વિનંતિ મારી વારીવારી, તમે આવો તો સારું. નથી કોઈ અપેક્ષા કશુંયે પામવાની હરિવર, પિંડેપિંડે તમને ધારીધારી, તમે આવો તો સારું. બત્રિસ કરોડ ઝંખે હરપળ તમારું આગમનને, એંધાણી દીસે સારીસારી, તમે આવો તો સારું. આજ છે ઝંખના અંશીને પામવા કાજે અંશની, દ્યોને દિલદુગ્ધા ઠારીઠારી, તમે આવો તો સારું. - ચૈતન્ય જોષી. " દીપક " પોરબંદર.
જેટલા માણસ એટલા અર્થો નીકળતા ઘણા. તેથી જ બિચારા શબ્દો પણ અકળાતા ઘણા. જોડી-તોડી,દબાવી- નીચોવી કે શણગારી દેતા, જરૂરિયાત મુજબ અર્થોને અહીં ઘટાવાતા ઘણા. ક્યાંક સ્વાર્થની સંકુચિતતામાં સત્વ ગુમાવતાને, કોઈ ગુણીજનસંગાથે શબ્દો પણ હરખાતા ઘણા. અંતરનું અધર પર આવીને અટકી જતું ક્વચિત્, ભાષાથી પર મનોવેદનામાં એ હશે ઊકળતા હતા. બીંબ- પ્રતિબિંબ સમા શબ્દઅર્થ સાથ નિભાવતા, માનવની પામરતા પરખીને રખેને બળબળતા ઘણા. - ચૈતન્ય જોષી. " દીપક " પોરબંદર.
જનેજનમાં જનાર્દન નિહાળવાની વાત છે. તજી વૈખરી પરાવાણી ઉચ્ચારવાની વાત છે. મટી જાય સઘળા ભેદભાવ જો દૃષ્ટિ મળે, પછી જનસેવા પ્રભુસેવા ગણવાની વાત છે. મારા-તારાના ભેદ હટી જાય સહજ કક્ષામાં, ભૂલોકમાં જ સાકેત સહજ પામવાની વાત છે. ના લાગે કોઈ પારકા; બધા જ પોતીકા લાગે, સંકીર્ણતાના કુંડાળામાંથી નીકળવાની વાત છે. હરિ પણ હરખશે જો આવી દૃષ્ટિ મળી જાય, પૂજાપાઠ, સ્તુતિ એ સેવામાં ધારવાની વાત છે. - ચૈતન્ય જોષી. " દીપક " પોરબંદર.
Copyright © 2025, Matrubharti Technologies Pvt. Ltd. All Rights Reserved.
Please enable javascript on your browser
