ಬೆಂಗಳೂರಿನ ಯಾವುದೋ ಒಂದು ಹಳೆಯ ಸೈಬರ್ ಕೆಫೆಯ ಕತ್ತಲೆ ಮೂಲೆಯಲ್ಲಿ ಸೂರ್ಯ ಕುಳಿತಿದ್ದ. ಹೊರಗೆ ಮಳೆ ಸುರಿಯುತ್ತಿತ್ತು, ಒಳಗೆ ಕಂಪ್ಯೂಟರ್ಗಳ ಫ್ಯಾನ್ ಸದ್ದು ಬಿಟ್ಟರೆ ಬೇರೇನೂ ಕೇಳಿಸುತ್ತಿರಲಿಲ್ಲ. ಸೂರ್ಯ ಒಬ್ಬ ಎಥಿಕಲ್ ಹ್ಯಾಕರ್, ಆದರೆ ಇಂದು ಅವನು ಮಾಡುತ್ತಿರುವುದು ಎಥಿಕಲ್ ಆಗಿರಲಿಲ್ಲ. ಅವನ ಮುಂದಿದ್ದ ಟೇಬಲ್ ಮೇಲೆ ಒಂದು ವಿಚಿತ್ರವಾದ ಕೆಂಪು ಬಣ್ಣದ ಪೆನ್ ಡ್ರೈವ್ ಇತ್ತು. ಅದರ ಮೇಲೆ ಯಾವುದೇ ಕಂಪನಿಯ ಹೆಸರಿರಲಿಲ್ಲ, ಬದಲಾಗಿ ಒಂದು ಸಣ್ಣ ತಲೆಬುರುಡೆಯ ಚಿತ್ರ ಮತ್ತು Project 179 ಎಂದು ಕೆತ್ತಲಾಗಿತ್ತು.
ಈ ಪೆನ್ ಡ್ರೈವ್ ಅವನಿಗೆ ಸಿಕ್ಕಿದ್ದು ನಗರದ ಪ್ರಭಾವಿ ಉದ್ಯಮಿ ಮತ್ತು ಸಮಾಜ ಸೇವಕ ವಿಶ್ವನಾಥ್ ಶೆಟ್ಟಿ ಅವರ ಮನೆಯ ಕಸದ ಬುಟ್ಟಿಯಲ್ಲಿ. ವಿಶ್ವನಾಥ್ ಶೆಟ್ಟಿ ಹೊರನೋಟಕ್ಕೆ ದಾನಿಯಂತೆ ಕಂಡರೂ, ಅವರ ಅಡಿಯಾಳಲ್ಲಿ ಕರಾಳ ಲೋಕವೊಂದು ಅಡಗಿದೆ ಎಂಬ ಸಂಶಯ ಸೂರ್ಯನಿಗೆ ಇತ್ತು. ಆರ್ಯನ್ ನಡುಗುವ ಕೈಗಳಿಂದ ಆ ಪೆನ್ ಡ್ರೈವ್ ಅನ್ನು ತನ್ನ ಲ್ಯಾಪ್ಟಾಪ್ಗೆ ಕನೆಕ್ಟ್ ಮಾಡಿದ.
ಪೆನ್ ಡ್ರೈವ್ ಲೋಡ್ ಆಗುತ್ತಿದ್ದಂತೆ ಸ್ಕ್ರೀನ್ ಮೇಲೆ ಯಾವುದೇ ಫೋಲ್ಡರ್ಗಳು ಕಾಣಿಸಲಿಲ್ಲ. ಬದಲಾಗಿ ಇಡೀ ಲ್ಯಾಪ್ಟಾಪ್ ಕೆಂಪು ಬಣ್ಣಕ್ಕೆ ತಿರುಗಿತು. ಒಂದು ಪಾಪ್ ಅಪ್ ವಿಂಡೋ ಓಪನ್ ಆಯಿತು. Accessing Human Consciousness 10% Complete.
ಸೂರ್ಯ ಗಾಬರಿಯಾದ. ಪೆನ್ ಡ್ರೈವ್ ಕೇವಲ ಡೇಟಾ ಸಂಗ್ರಹಿಸುತ್ತಿರಲಿಲ್ಲ, ಅದು ಅವನ ಲ್ಯಾಪ್ಟಾಪ್ನ ಮೈಕ್ರೋಫೋನ್ ಮತ್ತು ಕ್ಯಾಮೆರಾವನ್ನು ಹ್ಯಾಕ್ ಮಾಡಿ ಅವನನ್ನೇ ಗಮನಿಸಲು ಶುರು ಮಾಡಿತ್ತು. ಸ್ಕ್ರೀನ್ ಮೇಲೆ ಒಂದು ವಿಡಿಯೋ ಪ್ಲೇ ಆಗತೊಡಗಿತು. ಅದು ಒಂದು ಕತ್ತಲೆ ಕೋಣೆಯ ದೃಶ್ಯ. ಅಲ್ಲಿ ಒಬ್ಬ ಮನುಷ್ಯನನ್ನು ಕಟ್ಟಿ ಹಾಕಲಾಗಿತ್ತು. ಸೂರ್ಯ ಆ ವಿಡಿಯೋವನ್ನು ಸೂಕ್ಷ್ಮವಾಗಿ ಗಮನಿಸಿದಾಗ ಅವನ ಎದೆ ಬಡಿತ ನಿಂತಂತಾಯಿತು. ಆ ವಿಡಿಯೋದಲ್ಲಿ ಕಟ್ಟಿ ಹಾಕಲ್ಪಟ್ಟಿದ್ದ ವ್ಯಕ್ತಿ ಬೇರೆ ಯಾರೂ ಅಲ್ಲ, ಸ್ವತಃ ಸೂರ್ಯ.
ಆದರೆ ಇದು ಹಳೆಯ ವಿಡಿಯೋ ಆಗಿರಲು ಸಾಧ್ಯವಿರಲಿಲ್ಲ, ಏಕೆಂದರೆ ವಿಡಿಯೋದಲ್ಲಿ ಸೂರ್ಯ ಇಂದು ಧರಿಸಿರುವ ಅದೇ ಬಟ್ಟೆಗಳನ್ನು ಧರಿಸಿದ್ದ. ಇದು ಹೇಗೆ ಸಾಧ್ಯ? ನಾನು ಇಲ್ಲಿ ಕುಳಿತಿದ್ದೇನೆ, ಅಲ್ಲಿರುವುದು ಯಾರು? ಎಂದು ಅವನು ಸುತ್ತಲೂ ನೋಡಿದ. ಸೈಬರ್ ಕೆಫೆಯಲ್ಲಿ ಯಾರೂ ಇರಲಿಲ್ಲ. ಆಗ ಅವನಿಗೆ ಅರಿವಾಯಿತು, ಈ ಪೆನ್ ಡ್ರೈವ್ ಕೇವಲ ಹಿಂದಿನದನ್ನು ಸಂಗ್ರಹಿಸುವುದಿಲ್ಲ, ಇದು ಮುಂದಿನ ಹತ್ತು ನಿಮಿಷಗಳಲ್ಲಿ ಏನಾಗಬಹುದು ಎಂಬುದನ್ನು ಊಹಿಸಿ ತೋರಿಸುವ ಒಂದು ಫ್ಯೂಚರ್ ಪ್ರೆಡಿಕ್ಷನ್' ಟೂಲ್.
ಸೂರ್ಯ ಪೆನ್ ಡ್ರೈವ್ ಕಿತ್ತು ಹಾಕಲು ಪ್ರಯತ್ನಿಸಿದ, ಆದರೆ ಅದು ಲಾಕ್ ಆಗಿತ್ತು. ಸ್ಕ್ರೀನ್ ಮೇಲೆ ಒಂದು ಧ್ವನಿ ಕೇಳಿಸಿತು. ಅದು ವಿಶ್ವನಾಥ್ ಶೆಟ್ಟಿಯ ಧ್ವನಿ. ಸೂರ್ಯ, ಈ ಪೆನ್ ಡ್ರೈವ್ ಅನ್ನು ನೀನು ಹುಡುಕಿದ್ದಲ್ಲ, ಇದು ನಿನ್ನನ್ನು ಹುಡುಕಿಕೊಂಡು ಬಂದಿದೆ. ಇದು ಕೇವಲ ಪ್ಲಾಸ್ಟಿಕ್ ತುಂಡಲ್ಲ, ಇದು ಮನುಷ್ಯನ ಮಿದುಳಿನ 'ಬ್ಯಾಕಪ್' ತೆಗೆದುಕೊಳ್ಳುವ ಒಂದು ಉಪಕರಣ. ನಿನಗೆ ಗೊತ್ತಾ? ನಿನ್ನ ತಂದೆ ಹತ್ತು ವರ್ಷಗಳ ಹಿಂದೆ ಕಣ್ಮರೆಯಾದಾಗ ಅವರು ಏನು ಮಾಡುತ್ತಿದ್ದರು ಎಂದು? ಅವರು ಈ ಕೆಂಪು ಪೆನ್ ಡ್ರೈವ್ ಅನ್ನು ಸಂಶೋಧನೆ ಮಾಡುತ್ತಿದ್ದರು.
ಸೂರ್ಯನ ತಂದೆ ಒಬ್ಬ ದೊಡ್ಡ ಡೇಟಾ ಸೈಂಟಿಸ್ಟ್ ಆಗಿದ್ದರು. ವಿಶ್ವನಾಥ್ ಶೆಟ್ಟಿ ಅವರನ್ನು ಕೊಂದಿದ್ದು ಇದೇ ಪೆನ್ ಡ್ರೈವ್ಗಾಗಿ ಎಂಬ ಸತ್ಯ ಈಗ ಬಯಲಾಯಿತು. ಪೆನ್ ಡ್ರೈವ್ನಿಂದ ಒಂದು ಸಣ್ಣ ಸೂಜಿಯಂತಹ ವೈರ್ ಹೊರಬಂದು ಸೂರ್ಯನ ಬೆರಳಿಗೆ ಚುಚ್ಚಿತು. ಅವನ ರಕ್ತದ ಮೂಲಕ ಒಂದು 'ಡಿಜಿಟಲ್ ವೈರಸ್' ಅವನ ನರಮಂಡಲಕ್ಕೆ ಹರಿಯಿತು. ಸೂರ್ಯ ಈಗ ಕೇವಲ ಮನುಷ್ಯನಲ್ಲ, ಅವನು ಆ ಪೆನ್ ಡ್ರೈವ್ನ ಒಂದು ಹ್ಯೂಮನ್ ಹಾರ್ಡ್ ಡಿಸ್ಕ್ ಆಗಿ ಬದಲಾಗುತ್ತಿದ್ದ. ವಿಶ್ವನಾಥ್ ಶೆಟ್ಟಿಗೆ ಬೇಕಾಗಿದ್ದು ಇದೇ ಮನುಷ್ಯನ ಮಿದುಳನ್ನೇ ಪೆನ್ ಡ್ರೈವ್ ಆಗಿ ಬಳಸಿ, ಅದರಲ್ಲಿ ಕೋಟಿಗಟ್ಟಲೆ ಬೆಲೆಬಾಳುವ ರಹಸ್ಯ ಡೇಟಾವನ್ನು ಸ್ಟೋರ್ ಮಾಡುವುದು. ಮನುಷ್ಯ ಸತ್ತರೂ ಆ ಡೇಟಾ ಅವನ ಮಿದುಳಿನಲ್ಲಿ ಸುರಕ್ಷಿತವಾಗಿರುತ್ತದೆ.
ಸೈಬರ್ ಕೆಫೆಯ ಬಾಗಿಲು ತೆರೆಯಿತು. ವಿಶ್ವನಾಥ್ ಶೆಟ್ಟಿ ತನ್ನ ಬಾಡಿಗಾರ್ಡ್ಗಳೊಂದಿಗೆ ಒಳಗೆ ಬಂದರು. ಅವರು ನಗುತ್ತಾ ಸೂರ್ಯನ ಹತ್ತಿರ ಬಂದರು. ಸೂರ್ಯ, ಈಗ ನಿನ್ನ ಮಿದುಳಿನಲ್ಲಿ ನನ್ನ ಇಡೀ ಸಾಮ್ರಾಜ್ಯದ ರಹಸ್ಯಗಳಿವೆ. ಈಗ ನಾನು ನಿನ್ನನ್ನು ಸಾಯಿಸಿದರೆ, ಆ ರಹಸ್ಯಗಳು ಮಣ್ಣಿನ ಅಡಿಯಲ್ಲಿ ಶಾಶ್ವತವಾಗಿ ನನಗೊಬ್ಬನಿಗೆ ಮಾತ್ರ ಲಭ್ಯವಾಗುತ್ತವೆ. ಪೆನ್ ಡ್ರೈವ್ ಕಳೆದುಹೋಗಬಹುದು, ಆದರೆ ಮೃತದೇಹ ಕಳೆದುಹೋಗುವುದಿಲ್ಲ ಎಂದು ವಿಶ್ವನಾಥ್ ತನ್ನ ಗನ್ ತೆಗೆದರು.
ಆದರೆ ಸೂರ್ಯ ಅಳಲಿಲ್ಲ. ಅವನ ಮುಖದಲ್ಲಿ ಒಂದು ವಿಚಿತ್ರವಾದ ನಗು ಮೂಡಿತು. ಅವನ ಕಣ್ಣಿನ ಬಣ್ಣ ಕೆಂಪಾಯಿತು. ಅವನು ಮಾತನಾಡಿದಾಗ ಅವನ ಧ್ವನಿ ಧ್ವನಿಯಾಗಿರಲಿಲ್ಲ, ಅದು ಅವನ ತಂದೆಯ ಧ್ವನಿಯಾಗಿತ್ತು.
ವಿಶ್ವನಾಥ್ ಹತ್ತು ವರ್ಷಗಳ ಹಿಂದೆ ನೀನು ನನ್ನನ್ನು ಕೊಂದಾಗ, ನಾನು ಸತ್ತೆ ಎಂದು ನೀನು ಅಂದುಕೊಂಡಿದ್ದೆ. ಆದರೆ ನಾನು ನನ್ನ ಇಡೀ ಪ್ರಜ್ಞೆಯನ್ನು ಈ ಪೆನ್ ಡ್ರೈವ್ ಒಳಗೆ ಅಪ್ಲೋಡ್ ಮಾಡಿದ್ದೆ. ನಾನು ಕಾಯುತ್ತಿದ್ದೆ, ಈ ಪೆನ್ ಡ್ರೈವ್ ನನ್ನ ಮಗನ ರಕ್ತದ ಸಂಪರ್ಕಕ್ಕೆ ಬಂದಾಗ ನಾನು ಮತ್ತೆ ಹುಟ್ಟಿ ಬರುತ್ತೇನೆ ಎಂದು. ಇಂದು ಆ ಸಮಯ ಬಂದಿದೆ.
ವಿಶ್ವನಾಥ್ ಶೆಟ್ಟಿಯ ಕೈ ನಡುಗತೊಡಗಿತು. ಸೂರ್ಯ ಈಗ ಒಂದು ಡಿಜಿಟಲ್ ಆತ್ಮವಾಗಿ ಬದಲಾಗಿದ್ದ. ಅವನು ಕೇವಲ ತನ್ನ ಲ್ಯಾಪ್ಟಾಪ್ ಮಾತ್ರವಲ್ಲ, ಇಡೀ ಸೈಬರ್ ಕೆಫೆಯ ಎಲೆಕ್ಟ್ರಾನಿಕ್ ಸಿಸ್ಟಮ್ ಅನ್ನು ಹ್ಯಾಕ್ ಮಾಡಿದ.
ಸೂರ್ಯ ತನ್ನ ಬೆರಳನ್ನು ವಿಶ್ವನಾಥ್ ಶೆಟ್ಟಿಯ ಫೋನ್ ಕಡೆಗೆ ತೋರಿಸಿದ. ಒಂದೇ ಕ್ಷಣದಲ್ಲಿ ವಿಶ್ವನಾಥ್ ಶೆಟ್ಟಿಯ ಇಡೀ ಬ್ಯಾಂಕ್ ಅಕೌಂಟ್ ಶೂನ್ಯವಾಯಿತು. ಅವರ ಎಲ್ಲಾ ಕಪ್ಪು ಹಣದ ವ್ಯವಹಾರದ ಸಾಕ್ಷ್ಯಗಳು ಇಂಟರ್ನೆಟ್ನಲ್ಲಿ ಲೈವ್ ಆದವು. ಅಷ್ಟೇ ಅಲ್ಲ, ಆ ಕೆಂಪು ಪೆನ್ ಡ್ರೈವ್ನಿಂದ ಹೊರಬಂದ ಹೈ-ವೋಲ್ಟೇಜ್ ಕರೆಂಟ್ ವಿಶ್ವನಾಥ್ ಶೆಟ್ಟಿಯ ಶರೀರವನ್ನು ಸುಡಲು ಶುರು ಮಾಡಿತು.
ವಿಶ್ವನಾಥ್, ಡೇಟಾವನ್ನು ಡಿಲೀಟ್ ಮಾಡಬಹುದು, ಆದರೆ ಸೇಡನ್ನು ಅಲ್ಲ ಎಂಬ ಗರ್ಜನೆಯೊಂದಿಗೆ ಸೈಬರ್ ಕೆಫೆಯ ಕಂಪ್ಯೂಟರ್ಗಳು ಒಂದೊಂದಾಗಿ ಬ್ಲಾಸ್ಟ್ ಆದವು.
ವಿಶ್ವನಾಥ್ ಶೆಟ್ಟಿ ಅಲ್ಲೇ ಸುಟ್ಟು ಭಸ್ಮವಾದರು. ಸೂರ್ಯ ಮೌನವಾಗಿ ಕುಳಿತಿದ್ದ. ಅವನ ಶರೀರದಲ್ಲಿದ್ದ ಆ ಪೆನ್ ಡ್ರೈವ್ ವೈರಸ್ ಈಗ ಶಾಂತವಾಗಿತ್ತು. ಅವನ ತಂದೆಯ ಆತ್ಮ ಅವನ ಮಿದುಳಿನ ಒಂದು ಮೂಲೆಯಲ್ಲಿ 'ಯರೀಡ್ ಓನ್ಲಿ' ಫೈಲ್ ಆಗಿ ಉಳಿದುಕೊಂಡಿತು.
ಮರುದಿನ ನ್ಯೂಸ್ನಲ್ಲಿ ಬಂದಿತು ಸಮಾಜ ಸೇವಕ ವಿಶ್ವನಾಥ್ ಶೆಟ್ಟಿ ನಿಗೂಢ ಶಾರ್ಟ್ ಸರ್ಕ್ಯೂಟ್ನಿಂದ ಮೃತರಾಗಿದ್ದಾರೆ. ಅವರ ಎಲ್ಲಾ ಅಕ್ರಮ ಆಸ್ತಿಗಳು ಅನಾಮಧೇಯವಾಗಿ ಬಡವರಿಗೆ ಹಂಚಿಕೆಯಾಗಿವೆ.
ಸೂರ್ಯ ಈಗ ಒಬ್ಬ ದೊಡ್ಡ ಬರಹಗಾರನಾಗಿ ಪ್ರಸಿದ್ಧನಾದ. ಅವನ ಪ್ರತಿಯೊಂದು ಸಸ್ಪೆನ್ಸ್ ಕಥೆಯೂ ಜನರಿಗೆ ಆಘಾತ ನೀಡುತ್ತಿತ್ತು. ಆದರೆ , ಅವನ ಕಥೆಗಳು ಕೇವಲ ಕಲ್ಪನೆಯಲ್ಲ, ಅವನ ಮಿದುಳಿನಲ್ಲಿರುವ ಆ ಪೆನ್ ಡ್ರೈವ್' ನೀಡುತ್ತಿರುವ ನೈಜ ಮಾಹಿತಿಗಳೆಂದು ಯಾರಿಗೂ ಗೊತ್ತಿರಲಿಲ್ಲ.
ಸೂರ್ಯ ತನ್ನ ಮಿದುಳಿನಲ್ಲಿರುವ ಆ ಡೇಟಾವನ್ನು ಚೆಕ್ ಮಾಡಿದಾಗ ಅವನಿಗೆ ಒಂದು ಫೈಲ್ ಕಂಡಿತು. Sandeep's_Story.txt. ಅವನು ಅದನ್ನು ಓದಿದಾಗ ಅದರಲ್ಲಿ ಸಂದೀಪ್ ಎಂಬ ಬರಹಗಾರ ಈಗ ಸದ್ಯಕ್ಕೆ ತನ್ನ ಎದುರು ಕುಳಿತು ಈ ಕಥೆಯನ್ನು ಬರೆಯುತ್ತಿರುವ ದೃಶ್ಯವಿತ್ತು.
ಸೂರ್ಯ ಮೌನವಾಗಿ ನಕ್ಕ. ಸಂದೀಪ್, ನಿನ್ನ ಮುಂದಿನ ಕ್ಲೈಮ್ಯಾಕ್ಸ್ ಕೂಡ ಈ ಪೆನ್ ಡ್ರೈವ್ನಲ್ಲೇ ಇದೆ, ಜಾಗರೂಕನಾಗಿರು.
