"વારંવાર બનતી રેપ જેવી ધૃણાસ્પદ ઘટના પર,આત્મચિંતન સાથે રજૂ કરું છું ગઝલ"
આપણા સંસ્કાર પર શંકા પડે એવું થયું છે,
વાણીને વે'વાર પર શંકા પડે એવું થયું છે.
અગ્નિમાં પાપી બળે એ સાંભળ્યું છે, જાનકી નહિ,
આગને અંગાર પર શંકા પડે એવું થયું છે.
રેલી, બેનર, મીણબત્તી ક્યાં સુધી લઈ ને ફરીશું,
ખોખલા સહકાર પર શંકા પડે એવું થયું છે.
હેડલાઈન જેવી ઘટના પાછલા પાને છપાઈ,
આજના અખબાર પર શંકા પડે એવું થયું છે.
'નારી તું નારાયણી' એ બોલવામાં સારું છે પણ,
આપણા આચાર પર શંકા પડે એવું થયું છે.
કોણ કાઢે કાટલું ને કોણ લૂંટે લાજ "સાગર"
લાખમાં દશ -બાર પર શંકા પડે એવું થયું છે.
સગર રાકેશ, સાગર, વડોદરા