जाडो२०७८...
🗣️मौसम सम्बन्धि जानकारी दिने समाचारमा त भनेकै थियो कि आज देखि एक हफ्ता सम्म अत्यधिक जाडो हुनेछ। हुनपनी आज तापक्रम हिजोको भन्दा घटेको छ। मेरा साथीहरूको भनाइमा जाडो हुनु भनेको मौसमले च्यालेन्ज गर्नु हो। र उनिहरु मौसमलाई च्यालेन्ज दिन शराबका बोतलहरुको कुमारित्व तोड्ने गर्छन्।
जाडो त म जस्तालाई भइरहेछ । मंसिरमा लगन जुराएर एकचिम्टी सिन्दुरमा ज्यान खरीद गरेका केटाहरू त तातो होलान्। अभागी नाथे त मै मात्र रहेछु । मंसिरको कोटामा परिएन। अब जाडो फागुन सम्म मेरो जीउभित्र छिरेर कहाँकहाँ काउकुती लगाउनेछ। सिरक डबल किनेको छु । ज्यान डबल नभएर के भो र ! कमसेकम सिरक त खप्टाएर सुतिन्छ।
भर्खरै अस्ति बिहे गरेको मेरो साथी दिपेशको याद आयो। उस्को बिहेमा सबभन्दा बढी नाचेको मै हुँला। उसलाई फोन गर्छु। रिङ लागेको त थियो, तर फोन उठाएन डाम्नाले। फेरि फोन लगाएँ। आठ रिङ जाँदामा पनि फोन उठाउंदैन त। एकदम मिल्ने साथी। एउटै खाटमा खुट्टा खप्टाएर सुत्ने साथी। एउटै मोजा पनि पालैपालो लगाइयो। खाना त एकैथालमा कतिपटक खाइयो, खाइयो । तर, आज उसले मेरो फोन उठाएन । रिस उठ्यो । चित्त पनि दुख्यो । भावुक भएँ। अनि म्यासेज लेखेँ- "छिटो उठा फोन।" एकछिनसम्म फोन आएन । यमबुद्दको 'तं कहाँ छस् साथी, म यहाँ सन्चै छु, तेरो याद आयो, तंलाई सम्झेर बस्दैछु' गीत सुनें । आँसु पनि तुरुक्क आयो। एकछिन मौन बसेँ।
फेरि फोन गरेँ। अब भने केटाले उठायो। गाली गर्दै भनेँ- "म भने त मुला साथी भनेपछि हुरुक्क। तेरो माया लागेर सम्झिए, तँ भने फोन नै नउठाउने। के भयो तलाइ यार? कहाँ छस्?"
उसले बिस्तारै भन्यो- "म ठिक छु यार। अहिले बुढीसंग छु।"
अब म पो आत्तिएं। उसले बिहे अस्ति मंसिर १४ गते मात्र गरेको। कुरा बुझ्नुपर्थ्यो मैले पनि ! एक वाक्य भनेर फोन कटाएँ,- "भाउजुलाई नमस्ते सुनाइदे है !"
|समाप्त
•लेखक :राजेश वि.क
Reply Version
https://m.facebook.com/story.php?story_fbid=pfbid02e3AVbPJtxyxnY9amoB2koewXA2N5HKTimaToFms9g58TLkKAiurEywsnRurmr5cZl&id=100002531367623
